Online ver. of Strida review on Next Mag. (Chinese Contents)

Source:
next.atnext.com/template/next/ar … 9&pageno=1

[size=75]玩物壯志[/size]
[size=150]十秒開合 摺疊單車隨身遊[/size]


Strida摺車成為Keith(右)新寵,經常帶住返深圳四圍踩。「舊同事Carol(中)同Alan(左)之前一齊踩A-bike,而家都俾我『毒』埋換車。」

踩單車屬低撞擊性帶氧運動,有效提升心肺功能,燃燒脂肪,兼且無損膝關節,好過跑步。
不過,想踩單車都幾麻煩,除非屋企有多餘位,否則擺架單車入屋,盞阻頭阻勢。泊街?隨時唔見零件,甚至成架單車被偷走,唔係講笑。
唔緊要,新款摺疊單車,開合過程只需十秒,便攜性高佔地少,方便收藏。拎住去旅行,或用來短途代步都就手。想踩單車做運動?隨時gogogo。

自遊行良伴
任職電訊業的Keith,返工忙,放工後通常只會約朋友摸杯底,鮮有健康活動。唯獨星期六,會約埋朋友北上「做運動」——踩單車遊深圳。
「香港玩到厭,上深圳玩,消費低,又容易發掘新景點,搵新餐廳試食。不過,行路搵好攰,搭車又唔夠靈活自在,見內地人踩住單車四圍去,就考慮買架摺車上來踩。」
不過,Keith一直找不到合適款式。「通常摺起都好大架,車又重,中途要上落樓梯,搬上搬落都幾攰。」左揀右揀,終於上年年尾見到A-bike,睇中可以摺到好細同輕身,即時慫恿朋友一齊買,拎返深圳試踩。
「方便好多,而且內地司機慣了單車文化,識得讓人,馬路又闊,覺得仲安全過踩香港路面。」不過,Keith嫌A-bike車轆太細,彈「踩唔得遠」,年頭又轉投Strida懷抱。
「可以變成手推車,推住行都唔覺辛苦。最好是個轆夠大,試過由羅湖關口踩去世界之窗,來回要兩個幾鐘,都應付到。」Keith二月去台灣旅行時,更帶埋Strida出門,踩勻半個台北。
「Strida在台灣好流行,可能因為地方大,踩的路程較遠,A-bike未必適合。不過,始終摺埋後都有一定體積,在台灣搭捷運,職員會要求用袋入起先可以入閘,香港搭地鐵同九鐵就未試過。」


雖然能摺成手推車,不過都幾阻定,搭九鐵時經常要搬位讓人行。


不但可以摺成手推車,而且又有多種顏色。


櫈底可以加裝小雜物袋,原廠行李架亦可放少量雜物。


車轆細,車架設計又簡單,踩慣單車的內地人都覺得好新奇,不停回望。

變形推車
Strida3.0規格表


品牌/產地:英國/台灣
摺疊尺寸:114/57/28cm
展開尺寸:128/108/51cm
重量:10kg
輪胎:41cm
最高載重量:250磅
售價:HK$3,300
網址:http://www.gum.hk/Pages/STRIDA.html
查詢:G.U.M. 2137 3884
技術要求:★★★★(5個★滿分)
試車後話:開合步驟簡單,幾乎唔使睇說明書;車轆大,適合踩長途,坐墊亦夠舒服。不過,摺起後依然大件,雖則可當手推車,但10kg車重都幾墜手;軚桿太飄,稍稍扭軚反應奇大,未上手,難以直線行車。

開合速試
1先將單車支架的底桿拉出,然後將靠磁石黐實的前後轆左右分開。
2將前後轆呈A字形拉開,再將底桿的孔位,套入前轆支架上的插柱上。
3將兩邊手柄扳起後再推入,最後鎖埋下方的固定掣(藍圈)及拉起腳踏,完成。


1


2


3

踩車知法
買完摺車,唔好以為可以亂踩,其實香港法例已列明踩單車的規限,違法,隨時受罰。
亂踩抵罰
根據《簡易程序治罪條例》第228章4條第8節,「任何人無合法權限或解釋而無明顯需要在行人路上策騎單車屬於違法」,一經定罪可罰款五百或監禁三個月。
錯在多心
就算技術高,想表演邊踩邊拖另一架單車的絕技,原來都犯法。道路交通條例第374G章51條規定,騎單車不得「手握或拖曳任何其他車輛」,違者會被檢控。
醉駕照罰
根據道路交通條例第374章47條,任何人「在酒類或藥物影響下騎踏單車,即屬犯罪,如屬首次被定罪,可處罰款HK$500。」
分照扣
踩單車時觸犯交通規例,例如衝紅燈、落斜超速,罰款之外,如果本身有駕駛執照,運輸署回覆指視乎情況,警方有機會扣埋分,「邊緣」人士,隨時踩到停牌。
查詢:政府熱線1823